Ցավազրկող միջոցները կարող են պտղի բնածին արատների պատճառ դառնալ. news.am

Կոդեինի եւ մորֆինի հիմքով ցավազրկող դեղամիջոցները կարող են պտղի բնածին արատների պատճառ դառնալ, պնդում են Հիվանդությունների վերահսկման եւ կանխարգելման ամերիկյան կենտրոնի գիտնականները: Նրանց խոսքով, օփիոիդների հիմքով դեղամիջոցները կարող են պտղի ուղեղին, ողնաշարին եւ սրտին լուրջ վնաս հասցնել, եթե կինը դրանք հղիության ժամանակ ընդունի:

Վերը թվարկված նյութերի հիմքով ուժեղ ցավազրկողները սովորաբար այն դեպքում են նշանակում, երբ առանց դեղատոմսի վաճառվող ցավազրկողները, ինչպիսիք են ասպիրինը կամ պարացետամոլը, չեն օգնում: Երբեմն այդպիսի ցավազրկող միջոցներն իսկապես անհրաժեշտ են հիվանդներին, սակայն խնդիրն այն է, որ հղիությունների մեծամասնությունը (համենայն դեպս, ԱՄՆ-ում) չպլանավորված է, եւ կանայք կարող են հղիանալ դեղամիջոցն ընդունելու ժամանակ կամ էլ սկսել ընդունել այն, իսկ հետո իմանալ հղիության մասին:

«Հղիության սկզբում ընդունված օփիոիդային դեղամիջոցները կարող են բնածին արատների պատճառ դառնալ եւ լուրջ խնդիրներ ստեղծել ինչպես երեխայի, այնպես էլ մոր համար,-ասել է Հիվանդությունների վերահսկման եւ կանխարգելման ամերիկյան կենտրոնի տնօրեն Թոմ Ֆրիդենը:- Վերարտադրողական տարիքի շատ կանայք են այդպիսի դեղամիջոցներ ընդունում՝ չիմանալով, որ հղի են եւ, այդպիսով, մեծ ռիսկի ենթարկելով սեփական դեռ չծնված երեխային»:

Ամերիկացի մանկաբույժ Խոսե Կորդերոն այդպիսի ցավազրկող միջոցներ ընդունող կանանց խորհուրդ է տալիս անպայման պաշտպանվել: Բժիշկներին էլ խորհուրդ է տալիս հղիանալու շանսեր ունեցող երիտասարդ կանանց օփիոիդային ցավազրկող միջոցներ չնշանակաել, իսկ եթե ավելի անվտանգ դեղամիջոցներ չկան, իսկ օփիոիդային ցավազրկող միջոցների նշանակելուց էլ հնարավոր չէ խուսափել, հարկավոր է կնոջ հետ քննարկել բոլոր այն վտանգները, որոնք այդպիսի դեղամիջոցն է կրում:

Հարցեր, պատասխաններ, մեկնաբանություններ