Med-Practic
Նվիրվում է վաստակաշատ ուսուցիչ Գրիգոր Շահյանին

Իրադարձություններ

Հայտարարություններ

Մեր հյուրն է

Հրատապ թեմա

Առողջապահություն 2.2011

Նորածնին կրծքով կերակրում

Նորածնին կրծքով կերակրում

Նորածնի համար մայրական կաթը լիարժեք սնունդ է, որին համարժեք փոխարինող միջոց մինչ օրս չի ստեղծվել: Այն պարունակում է նորածնին անհրաժեշտ բոլոր նյութերը: Հետազոտություններով պարզվել է, որ մոր կաթն իր քանակական և որակական կազմով համապատասխանում է հենց իր` երեխայի անհատական պահանջներին:

 

Այն իր բաղադրությամբ նմանակը չունի: Մայրական կաթը մարսվում է հեշտությամբ, պարունակում է վիտամիններ, հանքանյութեր, միկրոտարրեր, սպիտակուցներ (լակտոֆերին, իմունոգլոբուլին, լիզոցիմ), որոնք պաշտպանում են երեխային վարակներից, պաշտպանիչ դեր են կատարում ախտածին միկրոօրգանիզմների դեմ պայքարում և ձևավորում են մանկան իմունիտետը: Կրծքով կերակրվող երեխան հիվանդությունների նկատմամբ դառնում է անընկալունակ, փոքրիկի մոտ ստամոքսի խանգարումների, ալերգիաների, ռախիտի առաջացման վտանգը նվազում է 2-4 անգամ, իսկ հետագայում կանխարգելվում են ճարպակալումը, շաքարային դիաբետը, ասթման: Մայրական կաթը դրականորեն է ազդում երեխայի ֆիզիոլոգիայի, մտավոր, հուզական և հոգեկան զարգացման վրա:

 

Ինչու է կարևորվում նորածնին կրծքով կերակրումը 


Նորածնի ճիշտ և ռացիոնալ կերակրումը շատ կարևոր է նրա ֆիզիկական և հոգեկան բնականոն զարգացման համար: Հասուն, առողջ նորածնին ներկայումս մոտեցնում են մոր կրծքին անմիջապես ծնվելուց հետո` մոր և մանկան համատեղ կեցությունն ապահովելու համար: Մինչև 6 ամսական երեխաներին խորհուրդ է տրվում կերակրել բացառապես կրծքի կաթով, կերակրման ազատ ռեժիմով, ըստ երեխայի պահանջի և առանց գիշերային ընդմիջումների: Խորհուրդ չի տրվում տալ ջուր, թեյ, հյութեր£ Հավելյալ սնունդը կարելի է տալ սկսած 6 ամսականից, որոշ երեխաների (որոնք կազմում են շատ փոքր տոկոս)` 4-5 ամսականից£ Կրծքով կերակրումը օգտակար է ոչ միայն մանկիկի, այլև մոր առողջության համար. կրծքով կերակրող մոր օրգանիզմը հետծննդյան շրջանում ավելի արագ է վերականգնվում: Այսպես, կուրծք ուտելու ժամանակ մոր մոտ արտադրվում է օքսիտոցին հորմոնը, որը նպաստում է հղիության ընթացքում մեծացած արգանդի կրճատմանը: Կրծքով կերակրող մայրերն ավելի հազվադեպ են հիվանդանում կաթնագեղձերի և ձվարանների քաղցկեղով:

 

Սրանով, սակայն, չեն սահմանափակվում այդ առավելությունները: Կրծքով կերակրման ժամանակ մոր և մանկիկի միջև առաջանում է հոգեկան և զգացմունքային կապ: Մայրն արագ է դուրս գալիս հետծննդյան ճգնաժամից, իսկ երեխան հետագայում լինում է ավելի հանգիստ և հավասարակշռված: Միայն մայրը կարող է իր երեխային տալ այն, ինչ աշխարհում ոչ ոք չի կարող:

 

Օգտակար խորհուրդներ կրծքով կերակրողներին


  • Երեխային կերակրեք ըստ պահանջի, երբ կամենա, օրվա և գիշերվա ընթացքում, իսկ 2-3 ամսից հետո աշխատեք, որ կերակրումների միջև եղած ընդմիջումը լինի 3-4 ժամ:

  • Կերակրելիս հարմարավետ դիրք ընդունեք և թուլացեք: Մինչ այդ կարելի է կրծքերին տաք թրջոցներ դնել, թեթևակի մերսել` կրծքերի շուրջը ձեռքը հիմքից դեպի հարպտուկային շրջանակը գալարաձև շարժելով և մեղմորեն շոյելով:

  • Երեխային ճիշտ դիրքով կերակրեք, այնպես, որ նա ծծելիս բերանն առնի ոչ միայն պտուկը, այլև ամբողջ պտուկամերձ շրջանը: Ուշադիր եղեք, որ նա կարողանա քթով հանգիստ շնչել, այլապես կարող է ծամելով պտուկը վնասել, իսկ եթե կաթնածորանները սեղմի` կաթ չի ստանա, որն էլ կհանգեցնի կաթնարտադրության նվազման: 

  • Ամեն անգամ կերակրելիս առաջարկեք երկու կուրծքն էլ, ցանկալի է մի քանի անգամ:

  • Կերակրելուց հետո մնացած կաթը կթեք և տվեք բաժակով կամ գդալով, որպեսզի հետագայում մաստիտ չառաջանա:

  • Եթե երեխան երկար է քնում, ուտել չի պահանջում և վատ է աճում, յուրաքանչյուր 3-4 ժամը մեկ արթնացրեք և կերակրեք:

  • Եթե նա անհանգիստ է և հրաժարվում է կրծքից, փորձեք հանգստացնել ու նորից կերակրեք:

  • Թույլ տվեք, որ նա կուրծքը ծծի նաև հաճույքի համար: Սովորաբար երեխան կուրծքը դատարկում է 10-15 րոպեում: Երբեմն շարունակում է ծծել` բավարարելու համար ծծելու պահանջը, սակայն կրծքի մոտ 30 րոպեից ավելի մի պահեք, որպեսզի պտուկի վրա ճաքեր չառաջանան:

  • Ուտելիս երեխան օդ է կուլ տալիս, դրա համար կերակրելուց անմիջապես հետո մի պառկեցրեք: Պահեք նրան ուղղահայաց դիրքում, թեթև շոյելով մեջքը և սպասեք մինչև գղտա: 

  • Մոր հոգեկան ու նյարդային վիճակը մեծ ազդեցություն ունի կաթնագեղձերի գործունեության վրա: Նրա տրամադրությունն ազդում է կաթի քանակի վրա, ուստի աշխատեք հանգիստ լինել, խուսափեք հուզումներից և ավելորդ հոգսերից, հնարավորության դեպքում ավելի շատ հանգստացեք:

  • Աշխատեք հեղուկներ շատ խմել:

  • Պետք չէ երեխային ջուր կամ այլ հեղուկներ տալ:

 

Կրծքով կերակրելիս հաճախ հանդիպող դժվարություններն են անբավարար կաթնարտադրությունը, պտուկների ցավոտությունն ու ճաքերը, կրծքագեղձի գերլցվածությունը, կոշտացումը, բորբոքումը` մաստիտն ու թարախակույտը (աբսցես), կաթնածորանի խցանումը:

Այս բոլոր վիճակների կանխարգելման լավագույն միջոցը երեխայի ծննդյան պահից ի վեր նրան ըստ ուտելու պահանջի և ճիշտ դիրքով կերակրելն է:

 

Մայրը հաճախ է անհանգստանում և մտահոգվում, արդյո՞ք երեխան բավականաչափ կաթ է ստանում, թե ոչ, հատկապես, երբ շատ է լացում, հաճախակի կամ երկարատև ուտել է ուզում, իսկ կերակրելուց հետո կարծեք բավարարված չէ, կերակրելիս նյարդայնանում է կամ հրաժարվում կրծքից, ծծում է մատները կամ հագուստը:

 

Հիշեք, գրեթե բոլոր կանանց կաթնագեղձերը կարող են բավականաչափ կաթ արտադրել մինչև երեխայի 6 ամսական դառնալը` միայն կրծքով կերակրելու համար (անգամ զույգերին):

 

Այս նշանները, սակայն, ոչ միշտ են վկայում այն մասին, որ երեխան բավականաչափ կաթ չի ստանում: Ավելի հավաստի նշաններ են երեխայի քաշի ավելացումը և միզարձակման հաճախականությունը: Եթե միայն կրծքով սնվող երեխայի քաշն առաջին վեց ամիսների ընթացքում ավելանում է ամսական 500գ-ով կամ ավելի, ուրեմն նա բավարար քանակությամբ կաթ է ստանում:

 

Երեխայի բավարար չափով կաթ չստանալու հիմնական պատճառներն են` կրծքով կերակրման ուշ սկսելը, կարճատև կերակրումները, գիշերային ժամերին չկերակրելը, լրացուցիչ սնունդ կամ ժամանակից շուտ այլ սնունդ տալը, ծծակի և շշի օգտագործումը, երեխային սխալ դիրքով կերակրելը, մոր կասկածը, տագնապը, անվստահությունը կերակրելու իր կարողության նկատմամբ:

 

Առաջին 6 պատճառների դեպքում կրծքագեղձերը բավականաչափ չեն խթանվում և քիչ կաթ են արտադրում: Վերջին 3-ի դեպքում կաթը բավարար քանակությամբ է արտադրվում, բայց լավ չի արտամղվում: Երեխան կաթը դժվարությամբ է ստանում, գեղձերը լավ չեն դատարկվում և հաջորդ անգամ ավելի քիչ են լցվում: Անբավարար կաթնարտադրության ավելի հազվադեպ հանդիպող պատճառներից են մոր նոր հղիությունը, հակաբեղմնավորիչ հաբերի, միզամուղների օգտագործումը, ծայրաստիճան հյուծվածությունը, ծխելը և այլն:

 

Եթե ինչ-ինչ պատճառներով կաթի քանակությունը պակասել է և երեխան լավ չի աճում ու քիչ է միզում, մի հուսահատվեք և շարունակեք նրան մոտեցնել կրծքին: Նախքան լրացուցիչ կամ ժամանակից շուտ այլ սնունդ տալը, անհրաժեշտ է խորհրդակցել մանկաբույժի հետ: Հիշեք, մինչ լրացուցիչ սնունդ տալը յուրաքանչյուր անգամ պետք է կերակրել երկու կրծքով, հետո նոր լրացուցիչ կաթնախառնուրդ տալ, այն էլ բաժակով կամ գդալով: Խորհուրդ չի տրվում այն շշով կամ ծծակով տալ, քանի որ երեխան շատ արագ կհրաժարվի կրծքից: 

 

Խորհուրդ չի տրվում որպես լրացուցիչ սնունդ օգտագործել կովի կաթը, մածունը, նոսր շիլան: Կովի կաթը երբեք չի կարող փոխարինել մայրականին, քանի որ նրա մեջ հիմնական սննդանյութերի` սպիտակուցների, ճարպերի, ածխաջրերի հարաբերակցությունը տարբեր է: Մայրական կաթի սպիտակուցներն ավելի հեշտ են մարսվում և իրենց կառուցվածքով համապատասխանում են երեխայի օրգանիզմի պահանջներին: Ճարպերը կարևոր են երեխայի ուղեղի զարգացման համար: Կնոջ կաթը պարունակում է այնպիսի ածխաջրատներ (օրինակ` բետա-լակտոզա), որոնք կանխում են աղիքային ցուպիկի աճը: Մինչդեռ կովի կաթի շաքարային բաղադրամասը (ալֆա-լակտոզան) նպաստավոր միջավայր է այդ ցուպիկի աճման համար, որի պատճառով կովի կաթով սնվող երեխաներն ավելի հաճախ են հիվանդանում ստամոքսաաղիքային սուր խանգարումներով: Կովի կաթով սնվող երեխան պետք է անընդմեջ գտնվի բժշկի հսկողության տակ և լրացուցիչ ստանա վիտամինային և սննդային մյուս անհրաժեշտ հավելումները:

 

Կրծքով կերակրող մոր սննդակարգը


Կրծքով կերակրման շրջանում մոր սննդակարգը պետք է լինի առավելագույնս հավասարակշռված, լիարժեք և երեխայի համար անվնաս: Մայրական կաթի օգտավետությունն անմիջապես որոշվում է դրա որակով ու քանակով: Կաթի մեջ պարունակվող սպիտակուցի քանակը կապված չէ մոր ընդունած սպիտակուցի քանակի հետ, իսկ ահա ճարպերի, վիտամինների և հանքանյութերի քանակի համար ամբողջությամբ պատասխանատու է մայրիկը: 

 

Կրծքով կերակրելու ժամանակաշրջանում բոլոր սննդանյութերի հանդեպ մոր օրգանիզմի պահանջը մեծանում է: Մոր կաթը նորածնի միակ սնունդն է, հետևաբար երեխայի կյանքի առաջին կես տարվա ընթացքում մոր սննդակարգը 500-600 կալորիայով պետք է գերազանցի հղիության ընթացքի համար նախատեսված սննդակարգին, որը կօգնի կնոջ օրգանիզմում լրացնել վիտամինների և միկրոտարրերի պակասը: Այն պետք է ներառի բոլոր հիմնական սննդային խմբերը` միս և ձուկ, կաթնամթերք, բուսական յուղ, կարագ, ձու, հաց, շիլաներ, մակարոնեղեն, բանջարեղեն, միրգ, հատապտուղներ, հյութեր, քաղցրավենիք և հրուշակեղեն: Ամեն ինչ, սակայն, պետք է լինի չափավոր: Ոչ ճիշտ հաշվարկված սննդակարգի հետեվանքով երեխայի մոտ կարող են առաջանալ ալերգիա, ռախիտ, գազեր: Ալերգիաներից խուսափելու համար չի կարելի չարաշահել շոկոլադը, մեղրը, ցիտրուսային մրգերը, պետք է հրաժարվել ապխտած, հնացած սննդից, համեմունքներից, կծու, թթու, աղի ուտելիքից, պահածոներից, մարինադներից, երշիկեղենից: Ցանկալի չեն նաև ստամոքսաաղիքային համակարգի խանգարում առաջացնող խաղողի, ինչպես նաև հրուշակեղենի, քաղցր կաթնաշոռի, պանրիկների, ալկոհոլային խմիչքի կամ շիլաների և շաքար պարունակող այլ սննդատեսակների օգտագործումը: Սխտորը, սոխը կարող են փոխել կաթի համը` վանելով երեխային դրանից:

 

Տավարի, հավի, խոզի անյուղ միսը, ձկնեղենը որպես սպիտակուցի աղբյուր պարտադիր են: Կաթնամթերքն ապահովում է կալցիումով: Միրգը և բանջարեղենը նույնպես պարտադիր են: Ցանկալի է սկսել խնձորից, այնուհետև ավելացնել թթվային փոքր պարունակությամբ այլ մրգեր: Նախընտրելի է կանաչ գույն ունեցող բանջարեղենը, իսկ գունավորը` օգտագործել ապուրների մեջ: Քաղցրի մեծ պահանջի դեպքում կարելի է ուտել մարմելադ, չիր, մուրաբա, հացաբուլկեղենից` փխրուն չորաբլիթներ, իսկ շոկոլադե տորթերից` հրաժարվել:

 

Կաթնարտադրությունն ավելացնելու համար խորհուրդ է տրվում օգտագործել սև և սպիտակ բրինձ, լոբի, խաշած ոսպ, բոված կտավատ, քունջութ, ձուկ, մասուր, խնձոր, ընկույզ, գազար, չամիչ, կաղամբ, անիսոնից, եղինջից, սամիթի սերմերից պատրաստած թուրմ կամ թեյ, ինչպես նաև յոդացված աղ: Կերակրող մայրը օրական երկու և ավելի լիտր հեղուկ պետք է խմի, ցանկալի է ուտելուց 2-3 ժամ հետո կամ առաջ: 

 

Կարելի է օգտագործել նաև C, B1, B2, B6, B12 վիտամիններով և միկրոտարրերով` երկաթ, ֆոլաթթու, յոդ, կալցիում, սելեն, ցինկ և այլն, հարուստ սնունդ: Այդ պահանջարկը բավարարելու և երեխային անհրաժեշտ քանակությամբ վիտամիններով և միկրոտարրերով հարուստ սննդով ապահովելու նպատակով կերակրող մայրերին խորհուրդ է տրվում օգտագործել հղիների և կերակրող մայրերի համար նախատեսված վիտամինային համալիրներ: 

 

Կերակրող մոր համար շատ կարևոր է նաև աղիքների կանոնավոր աշխատանքը: Դրանք պետք է գործեն ամեն օր, ծայրահեղ դեպքում 48 ժամը մեկ: Փորկապությունը կանխելու համար անհրաժեշտ է սննդակարգում ներառել բավականաչափ միրգ, բանջարեղեն, առանց շաքարի կաթնաթթվային մթերք, վարսակի և հնդկաձավարի շիլա, հյութեր, կոմպոտներ և հատապտուղներ:

Հեղինակ. Գայանե Ավագյան բ.գ.դ., ՀՀ ԱՆ մայրական և վերարտադրողական առողջության բաժնի պետ
Սկզբնաղբյուր. Առողջապահություն 2.2011 (291)
Աղբյուր. med-practic.com
Հոդվածի հեղինակային (այլ սկզբնաղբյուրի առկայության դեպքում՝ էլեկտրոնային տարբերակի) իրավունքը պատկանում է med-practic.com կայքին
Share |

Հարցեր, պատասխաններ, մեկնաբանություններ

Մեդ-Պրակտիկ

15.05.2015

Հարգելի An, ֆոտոէպիլյացիան երեխայի ախորժակի վրա չի կարող ազդել;

An

10.05.2015

Իսկ էպիլացիայի համար ինչ կասեք

Մեդ-Պրակտիկ

10.05.2015

Հարգելի An, բարև Ձեզ: 8.5-9 ամսեկան երեխաների քաշը ըստ առողջապահության համաշխարհային կազմակերպության տվյալների հետևյալն են` աղջիկ երեխաների մոտ տատանվում է 6.5-10.5 կգ, տղաների մոտ` 7.1-11 կգ, անհանգստանալու կարիք չկա: Եթե երեխան հաճույքով ուտում է միրգ և բանջարեղեն կարող եք տալ, խնդիր չկա: Իհարկե միայն կրծքի կաթը կարող է չբակավականեցնել, փորձեք աստիճանաբար երեխային նաև ընտելացնել այլ սնունդի, թեկուզ քիչ-քիչ: 

An

05.05.2015

Իսկ երբ է կարելի,ասեմ, որ նարինջ է ուտում, շատ է սիրում ,ու ոչ մի ալերգիա չի լինում: Եվ մի հարց ևս, փոքրիկս 8,5 ամսական է 7 կգ է.կարիք կա անհանգստանալու, 3, 200 է ծնվել:Չի ուտում, մենակ կրծքի կաթիկ է ուտում:Ինչ տալիս եմ,1թ.գդալից ավել չի ուտում,մինչև 4 ամսականը քաշից ավել էր:Ես ֆոտո էպիլացիա եմ արել ,հնարավոր է այդ է պատճառը:Խնդրում եմ ասեք ինչ անեմ:

Մեդ-Պրակտիկ

05.05.2015

Հարգելի An, ելակը և լոլիկը հակված են սննդային ալերգիա առաջացնելու, առայժմ ցանկալի չէ:

An

02.05.2015

Իսկ ելակ կամ լոլիկ: Նախապես շնորհակալ եմ:

Մեդ-Պրակտիկ

30.04.2015

Հարգելի An, բարև Ձեզ: 8-9 ամսեկան բալիկներին արդեն կարելի է տալ ձուկ, ցանկալի է խաշած վիճակում և անպայման փշերը հանած: Ինչ վերաբերում է պաղպաղակին, կարելի է տալ հալեցված վիճակում: Հաց իհարկե կարելի է, ցանկալի է առանց թթխմորի:

An

28.04.2015

Բարեվ Ձեզ ,խնդրում եմ ասեք, երբ կարելիէ հաց ,պաղպաղակ ,և ձուկ տալ երեխային:Իմ փոքրիկը ուտում է , 8 ամսական է:

Մեդ-Պրակտիկ

04.04.2015

Հարգելի An, այո կարող եք, բայց ոչ մեծ քանակությամբ:

An

01.04.2015

Իսկ կարող եմ կանաչ թեյ խմեմ, նիհարելու համար:Կերակրում եմ կրծքով:երեխան 7 ամսական է

Մեդ-Պրակտիկ

29.03.2015

Հարգելի An, քանի որ ընդհանրապես կանաչիներն ունեն աղիները գրգռող հատկություն, ցանկալի է դեռևս ձեռնպահ մնալ դրանց օգտագործումից:

An

27.03.2015

Բարեվ Ձեզ ,շնորհակալ եմ ,որ պատասխանեցիք ,մեկ հարց ևս'կարելի է սպանաղ ,կամ աղինջ :

Մեդ-Պրակտիկ

27.03.2015

Հարգելի Anaida, ամենայն հավանականությամբ դա կապված է նյարդային համակարգի հետ: Ճիշտ կլինի դիմել մանկաբույժի:

Anaida

25.03.2015

che gazer chuni dex talisnk.bayc amboxj orn chi lacum ayl xjxjume jxaynanume

Մեդ-Պրակտիկ

24.03.2015

Հարգելի Anaida, հարկավոր է նախ պարզել երեխայի անհանգստության պատճառը, հնարավոր է ունի ցավեր, գազերն են անհանգստացնում և այլն: Խնդիրը կարող է կապված լինել նաև նյարդային համակարգի հետ: Ներկայումս կան հոմեոպաթիկ միջոցներ, որոնք կարգավորում են քնի ռեժիմը: Դրանք նշանակվում են միայն մանկաբույժի կողմից: Որևէ միջոց նշանակելուց առաջ, հարկավոր է բացառել այլ խնդիրները, որոնք առաջացնում են քնի խանգարում: Խորհուրդ է տրվում դիմել մանկաբույժի կոնսուլտացիայի:

anaida

23.03.2015

xndrumem asek erexas erek amsekane u chi knum mboxj or nervayin vijakume nvnvume lacume.

Մեդ-Պրակտիկ

22.03.2015

Հարգելի An, բարև Ձեզ: Այդ տարիքի երեխաներին ցանկալի է տալ կարագով պատրաստված ապուրներ կամ շիլաներ, ընտրությունն անհատական է: Չափաբաժինը կախված է արդեն պատրաստվող ճաշի տեսակից, ցանկալի չէ յուղոտ ճաշեր տալը, դրանք դժվարամարս են, և հնարավոր է երեխան չյուրացնի: Միայն կարագ նույնպես խորհուրդ չի տրվում: Ստորև ներկայացնում ենք հղում, որտեղ կգտնեք օգտակար ինֆորմացիա.

 

http://www.med-practic.com/arm/70/12786/article.more.html

An

20.03.2015

Բարեվ Ձեզ ,խնդրում եմ ասեք ճաշիկներ պատրաստելու համար ինչ կարագ կամ բուսական յուղ օգտագործեմ և ինչ քանակությամբ:Եվ կարելի է արդյոք մենակ կարագ տամ երեխային:Փոքրիկս 7 ամսական է:

Մեդ-Պրակտիկ

01.03.2015

Հարգելի An, եթե տան անդամներից մեկի մոտ կա ասկարիդոզ, ապա անպայման անհրաժեշտ է փոքրիկի մոտ ժխտել հելմինթի առկայությունը, քանի որ Ձեր նշած կլինիկական ախտանիշները շատ բնորոշ են հելմինթներին, մասնավորապես ասկարիդոզին: Հարկավոր է անպայման կատարել բակտերիոլոգիական հետազոտություն այն էլ մի քանի անգամ, և հաստատվելու դեպքում համապատասխան բուժում նշանակել: Նշեմ նաև որ, ասկարիդոզի դեմ դեղորայք պետք է ստանան ընտանիքի մյուս բոլոր անդամները: 

An

12.02.2015

Մի բան էլ հարցնեմ.եթե տան անդամներից մեկի մոտ ասկարիդ կա. հնարավոր է դա անցնի փոքրիկիս.ինչ անեմ

An

12.02.2015

Բարեվ Ձեզ,խնդրում եմ ասեք, ինչ՞ անեմ:Երեխայիս մոտ փորկապություն է,արդեն 1 ամիս է 4- 5 օրը մեկ մոմիկ եմ դնում, մոտ 6 ամսական է,մինչ այդ աղիքները նորմալ գործել են, օրը մի քանի անգամ:Ասեմ որ կրծքով եմ կերակրում:Տոներից հետո այդպես եղավ:Այդ ընթացքում միայն բանան եմ տվել շատ քիչ, հնարավոր է բանանից լինի:Հիմա քաշը պակաս է,5.300, առաջ նորմայից ավել էր: Չի ուտում ինչ տալիս եմ զզվում է ,փսխում է կաթն էլ թափում:Մանկաբույժը ասեց ախորժակ չունի ու հիպ 1 նշանակեց որ, խմացնեմ, չնայած ես կաթիկ ունեմ: Հիպն էլ բաժակով եմ տալիս .որ կաթից չկտրվի:Խնդրում եմ հնարավորրինս շուտ պատասխանեք:

Մեդ-Պրակտիկ

21.12.2014

Հարգելի An, ցավում եմ պատասխանն ուշացած է, եթե խնդիր կա, գրեք մեզ:

An

05.11.2014

Բարեվ Ձեզ, շնորհակալ եմ,որ պատասխանեցիք: Խնդրում եմ ասեք,հնարավոր է երեխան աղիքների խնդիր ունենա,եթե դժվար է կեղտոտում:Ամեն օր նորմալ գործում են աղիքները,օրը մոտ 5 անգամ,շատ թույլ ,բայց շատ է տանջվում,գազեր ունի:Գազիկների համար էլ ինչ խմացնում եմ, կեղտը ավելի է թուլանում,բայց էլի տանջվում է: Ինչ՞ անեմ: Ասեմ որ երեխան 2.5 ամսական է:

Մեդ-Պրակտիկ

04.11.2014

Հարգելի An, զկրտոց առաջանում է արագ կուլ տալու արդյունքում: Եթե կերակրելիս երեխան հնարավորինս պտուկը ճիշտ բռնի, օդ կուլ չկա, հաճախակի կուրծքը բաց չթողնի, հետո նորից բռնի, հնարավորինս կպակասի: Սակայն, եթե կաթն առատ և արագ  թափվում, իսկ երեխան էլ արագ է կուլ տալիս, դժվար է կանխարգելել զկրտոցը

Մեդ-Պրակտիկ

04.11.2014

Հարգելի An, կանաչ թեյն ավելի շատ կոֆեին է պարունակում ու դեռևս վաղ է այն օգտագործել հատկապես կրծքով կերակրելու պարագայում:

An

16.10.2014

Ինչու՞ չեք պատասխանում

An

25.09.2014

Ամեն անգամ կերակրելուց հետո ,երեխայիս մոտ զկրտոց է սկսվում ,խնդրում եմ ասեք ինչիից է , և ինչ անեմ:1,5 ամսական է.

An

24.09.2014

Բարեվ ձեզ ,փոքրիկս 1,5 ամսական է ,խնդրում եմ ասեք ,կարող եմ կանաչ թեյ խմել.Կերակրում եմ կրծքով.

Մեդ-Պրակտիկ

27.08.2014

Հարգելի Անի, լակտացիան խթանում են ձավարեղենը, թեյը, ոչ ալկոհոլային գարեջուրը, ձմերուկը, եփած կարմիր բազուկը, գարեջրի դրոժները և յալն: Բայց չի բացառվում, որ սակավ լակտացիան Ձեր օրգանիզմի ֆիիզիոլոգիական առանձնահատկություններից լինի:

Անի

23.08.2014

բարև ձեզ...իսկ որ սնունդն է անմիջապես խթանում կաթնարտադրությանը...թե դա յուրաքանչյուրի մոտ խիստ անհատական է?

Կարդացեք նաև

Աշխարհասփյուռ հայ բժիշկների երրորդ համագումարը
Աշխարհասփյուռ հայ բժիշկների երրորդ համագումարը

 ՀՀ առողջապահության, կրթության և գիտության ու սփյուռքի նախարարությունների նախաձեռնությամբ վերջերս Երևանի Մ. Հերացու անվան պետական բժշկական համալսարանի նիստերի դահլիճում կայացավ հայ բժիշկների միջազգային երրորդ համագումարը...

Իրադարձություններ Հայաստանում Միջոցառումներ
Նորը` Հայաստանի բժշկական գրադարանում
Նորը` Հայաստանի բժշկական գրադարանում

Երկու տարի առաջ էր, որ լրացավ ՀՀ ԱՆ հանրապետական գիտաբժշկական գրադարանի 70 տարին: Իր գոյատևման ընթացքում գործելով`«Առավելագույնս նպաստել Հայաստանի բժշկագիտության զարգացմանը»նշանաբանով...

Միջոցառումներ
Հայաստանի միջազգային բուժքույրական առաջին համագումարը
Հայաստանի միջազգային բուժքույրական առաջին համագումարը

Մեր հանրապետությունում բուժքույրերի շահերի և իրավունքների պաշտպանության, պրակտիկ գործունեություն և կրթական պատշաճ մակարդակ ապահովելու նպատակով «Էրեբունի» պետական բժշկական քոլեջի...

Իրադարձություններ Հայաստանում Միջոցառումներ
Համառոտ` ցողունային բջիջների մասին

Բանալի բառեր. ռեգեներատիվ բժշկություն, արյունաստեղծ, մեզենխիմային, սաղմնային ցողունայինբջիջներ

Դեռևս X դարի սկզբներին մեծն Ավիցեննան նշում էր, որ բժշկի գործիքներն են խոսքը, բույսը և դանակը...

Բուժման մեթոդներ
Ֆիտոբեզոարի առաջացրած բարակաղիքային անանցանելիության բուժման մեր փորձը

Բանալի բառեր. ֆիտոբեզոար, բարակաղիքային անանցանելիություն

Ներածություն: Բարակաղիքային մեխանիկական անանցանելիությունը բարակ աղիքի վիրաբուժական միջամտություն պահանջող և առավել հաճախ հանդիպող ախտաբանական վիճակ է...

Գաստրոէնտերոլոգիա, լյարդաբանություն Վիրաբուժություն Բուժման մեթոդներ
Միզասեռական կանդիդոզի բուժումը միկոֆլու դեղամիջոցով

Բանալի բառեր. Միզասեռական կանդիդոզ, միկոֆլու, ֆլուկոնազոլ

Ներածություն: Մանկաբարձագինեկոլոգիական հիվանդությունների կառուցվածքում սնկային` կանդիդային վուլվովագինիտը (ԿՎՎ) շարունակում է զբաղեցնել առաջատար...

Վարակաբանություն Պերինատոլոգիա, մանկաբարձություն և գինեկոլոգիա Ուրոլոգիա Վեներաբանություն Դեղագիտություն
Աղիքների դիսբակտերիոզի (դիսբիոզ) բուժման նոր տարբերակ
Աղիքների դիսբակտերիոզի (դիսբիոզ) բուժման նոր տարբերակ

Մակրոօրգանիզմը` իր միկրոֆլորայի հետ միասին, ամբողջական էկոլոգիական համակարգ է, որը մշտապես գտնվում է հավասարակշռության վիճակում: Չնայած օրգանիզմի վրա արտաքին միջավայրի տարբեր գործոնների...

Գաստրոէնտերոլոգիա և լյարդաբանություն
Լեյշմանիոզներ` մոռացված հիվանդություններ
Լեյշմանիոզներ` մոռացված հիվանդություններ

Առաջին անգամ «մոռացված, արհամարհված հիվանդություններ» (neglected diseases) տերմինն օգտագործվել է Առողջապահության համաշխարհային կազմակերպության (ԱՀԿ) կողմից` 2001թ., ինֆեկցիոն և մակաբուծային բնույթի մի խումբ...

Վարակաբանություն
Սթրես

Սթրեսը վտանգի, մարտահրավերների և միջավայրի փոփոխությունների դեպքում առաջացած ընդհանուր հարմարվողական համախտանիշն է, որի հայեցակարգը մշակել և զարգացրել է կանադացի բնագետ...

Հոգեկան առողջություն
Այսպես պետք է լինի միշտ և ամենուր
Այսպես պետք է լինի միշտ և ամենուր

Հայաստանի Հանրապետության Կառավարությունը տարվա ամենաերկար օրվա նախօրեն մշտապես նվիրել է երկարօրյա աշխատանքին վարժված, այլոց հոգսերն իրենցը դարձնելու երդմանը հավատարիմ բուժաշխատողներին...

Միջոցառումներ
Սամվել Անուշավանի Խաչատրյան. սիրած գործի նվիրյալը
Սամվել Անուշավանի Խաչատրյան. սիրած գործի նվիրյալը

Սամվել Անուշավանի Խաչատրյան. ով թեկուզ մեկ անգամ գործ է ունեցել բժշկական տեխնոլոգիաների և տեխնիկայի հետ, կճանաչի այդ ոլորտում բացառիկ գիտելիքներ և փորձառություն ունեցող...

Բժիշկներ
Սումամեդ` վերին շնչուղիների հիվանդությունների բուժման համար

Բակտերային ռինոսինուսիտների և տոնզիլոֆարինգիտների ժամանակ անհրաժեշտ է կիրառել ընդհանուր հակաբիոտիկոթերապիա: Մասնագետների մեծ մասի կարծիքով, մինչև 2 տարեկան երեխաներին ևս բոլոր դեպքերում հակաբիոտիկային...

Դեղամիջոցներ Շնչառական համակարգ
Երիկամաբորբ (նեֆրիտ)
Երիկամաբորբ (նեֆրիտ)

Մեզ խնդրել են գրել երիկամաբորբի մասին: Սակայն երիկամների` արտաթորության այս օրգանի մասին առանց տեղեկություններ տալու, դժվար կլինի պատկերացնել, թե ինչպիսի վնասակար ազդեցություն կարող են ունենալ հիվանդությունները...

Միզային համակարգ
Պարօդոնտ, պարօդոնտոզ
Պարօդոնտ,  պարօդոնտոզ

Այս երկու հիվանդությունների դեպքում ախտահարման օջախը նույնն է` պարօդոնտը (լատ. par-հար և odontos-ատամ): Խոսքը վերաբերում է հիմնականում ատամի արմատին հարող լնդոսկրային շերտին...

Ստոմատոլոգիա
Առաջին օգնությունը ուշագնացության ժամանակ
Առաջին օգնությունը ուշագնացության ժամանակ

Դժվար թե գտնվի մարդ, որն իր կյանքում ականատես եղած չլինի ինչ-որ մեկի ուշագնացությանը: Ըստ ամերիկյան վիճակագրական տվյալների, չափահաս մարդկանց մոտավորապես մեկ երրորդի կյանքում եղել է ուշագնացության գոնե մեկ դեպք...

Առաջին նախաբժշկական օգնություն

ԱՄԵՆԱԸՆԹԵՐՑՎԱԾ ՀՈԴՎԱԾՆԵՐԸ